Nagbata sa CR sang Sipalay Public Market ang isa ka iloy nga nagabulante sang herbal medicine.
Sa interview sang Bombo Radyo Bacolod kay Punong Barangay Mary Ann Torillo sang Barangay 1, Sipalay City, nagkadto sa ila ang personnel sang barangay nga assigned sa merkado kag nagpangita sang midwife apang sadto nga tion wala sang available.
Suno diri ang midwife nga nagaduty sa Barangay, amo man ang midwife sa Barangay 3.
Ginsuhestyon ni Torillo nga matawag na lamang sang rescue, kag nagtawag man ini sa midwife antes magpadulong sa CR.
Pahayag sang babayi nga sunod kuntani nga magagamit sang banyo nga natingala ini nga madugay nakagwa ang una nga naggamit, tubtob nga nabatian sini ang paghibi sang lapsag.
Ginhingagaw naman kuha sang babayi ang lapsag nga nagshoot sa basin.
Sang ginpamangkot sang Punong Barangay kun kumpleto na sa binulan ang baby, nagsabat ang iloy nga wala ini nakahibalo nga siya ang nagabusong.
Pahayag sini nga siya ang wala nagpaprenatal bangod wala ini nagpinsar nga siya ang magabusong bangod nagagamit ini sang pills.
Ang lapsag ang ika-lima na nga bata sang babayi.
Ang mag-asawa ang pangayaw sa Sipalay City kag nagabulante lamang sa merkado sang herbal nga bulong.
Gilayon man nga gindala ang mag-iloy sa birthing center sang Barangay 1.
Sa karun yara naman sa maayo nga kahimtangan ang mag-iloy kag nakapauli naman sa ila nga lugar.
