Ginahulat pa sang Land Transportation Office – Negros Island Region ang derektiba tuhoy sa pagpanakop sang mga e-bike kag e-trike nga nagabyahe sa mga National Highways.
Sa interview sang Bombo Radyo Bacolod kay LTO-NIR Director Jeck Conlu, apisar nga nagpagwa na sang statement sa media si LTO Chief Assistant Secretary Markus Lacanilao nga magasugod na ang pagpanakop sa Disyembre 1, sila ang wala pa makabatun sang official communication gikan sa LTO Central Office.
Suno diri, ginahulat nila ang ipanaog nga guidelines nga basihan sang pag-impound ukon pagdakop sang mga e-bike kag e-trike sa national roads.
Sa karun sila ang naga-estorya naman sa mga special operating team.
Suno kay Conlu ila man nga ginatumod kun may mga banwa ukon ciudad nga may ginapatuman na nga ordinansa nga naga-regulate sa mga ebike kag etrike.
Aminado ini nga may internal rules and regulation (IRR) na sadto angot sa ebike kag etrike, nga indi pa maseguro kun amo gihapon ang ipatuman bangod ini ang malawig naman nga gin-untat.
Suno kay Conlu, wala sang rehistro ang mga e-bike kag e-trike samtang wala man sang lisensya ang mga drivers, indi kaangay sa tricycle nga may prangkisa, rehistro kag may nagakinahanglan sang driver’s license.
Samtang hingyo naman sang e-bike driver nga sila ang mahatagan sang routa nga mabyahe-an.
Sa interview sang Bombo Radyo Bacolod kay Joey Suarez alyas Tagot, siya ang may-edad na kag mabudlay na magpangita sang iban nga masayluhan nga trabaho.
Pahayag sini nga ang pagbyahe sang e-bike gid lamang ang ila source of income kun sa diin sila ang makakolekta man sang P500 kada adlaw, nga mas madako pa kun baka-bakahan sa pagbyahe.
Wala naman sila sang mahimo kun madayun ang pagpanakop sa mga ebike kag etrike sa national roads, gani panawagan na lamang sini nga sila mahatagan sang routa kun sa diin permanente nga makabyahe.
