Tatlo ka motorsiklo kag isa ka tricycle nga nagabaligya sang tinapay ang nagkarambola sa Hernaez Avenue, Brgy Mansilingan, Bacolod City kaina sang kaagahon.
Sa interview sang Bombo Radyo Bacolod kay Alyas Beng, nakalabay sa insidente, apat tanan ang involved kun sa diin ang tricycle kag isa ka motorsiklo ang nagabyahe sa east to west direction samtang ang duha ka motorsiklo ang pasaka naman sa bukid ukon west to east.
Suno kay Beng, ang isa ka motorsiklo nga pabukid nga kuntani yara sa right lane, ang nagalabay sa left lane, gani nasumalang sini ang tricycle nga may tinapay.
Nahimo naman nga makaprino sang tricycle driver, samtang naglikaw man ang motorsiklo gani nakabunggo sa motorsiklo nga parehas sini nga pabukid.
Samtang ang tricycle ang nabungguan naman sang nagasunod nga motorsiklo.
Bangod sa impact sang pagbinunggu-anay, naglalabog ang mga driver, apang ang natam-an amo ang nakabunggo sa tricycle.
Bangod ini ang wala sang helmet, nakabunggo ang ulo sang driver sa sementado nga dalan kag ini ang nagdugo.
Nagpalagyo naman ang driver sang motorsiklo nga nagadalagan sa sala nga lane.
Wala naman natumod kun ini ang yara sa impluwensya sang makahulubog nga ilimnon.
