Preparado na ang tanan nga mga Local Disaster Risk Reduction and Management Offices sa Negros Occidental para sa paglabay sang Bagyo WILMA.
Sa interview sang Bombo Radyo Bacolod kay Negros Occidental Provincial Disaster Risk Reduction and Management Office Head Irene Bel Ploteña, ginmeeting na sini ang mga LDRRMO heads upod sa mga rescue and retrieval personnel.
Ang tagsa ka LDRRMOs ang nagplastar naman sang ila mga plano kag mga himuon nga tikang sa pagtupa sang Bagyo.
Sa karun wala pa sang recorded nga mga nagbakwit, apang nakabatun sang impormasyon si Ploteña nga may mga pumuluyo na nga nagmato-mato sa pagpadulong sa mga evacuation centers.
Ini ang nagapakita nga natrauma na ang pila ka mga residente sa kahalitan sang mga naglabay nga bagyo partikular na sa Bagyo TINO.
Pahanumdom sini nga bisan pa makita sa weather forecast nga indi maglabay sa mismo nga lugar, wala nagakahulugan nga indi na kinahanglan magbakwit.
Suno diri, dapat mag-aligmat ilabi na ang mga pumuluyo sa lugar nga nabahaan na sang nakaligad bangod yara gid ang posibilidad nga liwat magluntad ang pagbaha.
Ginalantaw ni Ploteña nga magasugod naman ang mga LGUs sa pagpatuman sang preemptive evacuation subong nga hapon. SAMTANG…ginpahayag sang Bacolod City Disaster Risk Reduction and Management Office nga mas maayo na nga masobrahan sa preparasyon sangsa kulangon para sa pagsulod sang Bagyo WILMA.
Sa interview sang Bombo Radyo Bacolod kay Earl Edward Ramirez, Chief of Operations sang Bacolod CDRRMO, ginpasaka na nila ang sa red alert status ang departamento.
Gani preparado na ano man nga oras nga madispatch ang mga CDRRM personnel kag mga equipments.
Nagpatigayon na sila kahapon sang Pre-Disaster Risk Assessment (PDRA) upod sa mga opisyales sang Barangay.
Suno kay Ramirez, wala pa sila sang reported nga nagbakwit, apang nagalaom ini nga magasugod na ang mga preemptive evacuations subong nga hapon ukon sa gab-i.
Santo sa weather forecast, bwas tubtob sa Domingo gid ang malauman nga pagbunok sang ulan.
Sa karun yara sa Yellow Rainfall Warning ang Bacolod City nga nagakahulugan nga mahimo magdangat sa 50 mm nga ulan ang mahimo ibubo sa kada adlaw.
Bwas yara ang posibilidad nga ini ang mangin Orange Rainfall Warning na ukon 100 mm nga rainfall ang magatupa ukon mas madamol pa.
Aminado si Ramirez nga indi parehas sa Bagyo VERBENA ang kabaskugon sang Bagyo WILMA, apang sila ang nagapreparar para sa worst case scenario, bangod para sa ila mas maayo nga sobra ang preparasyon sangsa magkulang.
Liwat nga ginpahanumdom ni Ramirez sa mga nagapuyo sa flood prone areas kag shoreline nga mag-aligmat kag indi na magduhaduha sa pagbakwit kun may panugyan na sa preemptive evacuation.
