Medyo nadelay ang pagplastar sang palupok sa banwa sang Hinigaran, ang Pyrotechnic Capital sa Negros Occidental bangod sa kahalitan sang Bagyo TINO.
Sa interview sang Bombo Radyo Bacolod kay Navarro Baylon, Chairman Emeritus sang Hinigaran Firecracker and Pyrotechnics Devices Manufacturers, Dealers and Retailers Association Incorporated, sa karun amat-amat palang nga ginakay-o ang ila nga pwesto sa Barangay Anahaw nga nagguba bangod sa Bagyo TINO.
Suno kay Baylon, siya lamang ang dealer/retailer kag ang 31 nila nga miyembro ang lunsay retailer lamang.
Ang permit sa pagbaligya sang mga retailers ang halin Disyembre 1 tubtob 31 lamang, apang siya bilang dealer ang makabaligya sa bilog nga tuig.
Sila ang natalana nga mag-opening sale sa Disyembre 14.
Dugang pa sini, nga luwas sa nagkalaguba nga balaligyaan, naapektuhan man ang ila nga mga factory kun sa diin nagkalapalos ang mga kamalig kag ginbahaan.
Bangod sini madamo man sang mga palupok nga wala pa matapos ukon ang wala pa madala sang mga bodega.
Sa pihak sini, nagalaom si Baylon nga bisan malip-ot na lamang ang tion sa pagbaligya, sila ang makabawi gihapon.
Sa pagsulod sang Bagyo WILMA, ginpreparar naman nila ang mga factory kag bodega kag ginpanghigot na ang mga atop bilang pangaman inkaso may dala nga mabaskog nga hangin ukon ulan ang Bagyo.
