May mga tawo gid ya nga mga abilidadan kaangay lamang sa isa ka robotics industry sang Iran ang nabisto nga ang duha ka “advanced humanoid robots” nga ginpasundayag sa natapos lang nga Kish Inox Tech Expo ang mga matuod nga tao ang nakasuksok sang robot costume.
Sa mga nagalapta nga video, makit-an ang isa ka lalaki kag babayi nga “robot” nga nakasuksok sang silver costumes nga may nakasulat nga binary code (mga numero nga 0 kag 1).
Sa isa ka clip, nagpakilala pa ang babayi bilang “Miss Data” kag ginpahayag nga nagapuyo siya sa “blockchain space.”
Ginpaathag pa sini sa isa ka foreigner nga siya kag ang iya nga partner ang isa ka “koleksiyon sang data nga nagabuligay sa isa ka shared data code.”
Apang sa pihak sini, kita sa gihapon sa mga high-definition videos ang ila nga hulag-tawo.
Halata ang ila nga acne scars, ang natural nga pagpamisok sang mata, kag ang pagpitik sang dughan.
Bangud sa kahuy-anan nga naangkon, gilayon nga nagpanginwala ang Iran.
Gin-athag ni Hossein Afshin, isa ka opisyal sa Science and Technology sang Iran, nga wala sila sang kahilabtanan sa nasambit nga hitabo.
Dugang pa nila, istratehiya lang ini sang isa ka pribado nga kompanya para sa advertising kag indi ini ang opisyal nga representasyon sang teknolohiya sang pungsod.
