Padayon nga nagapabulong ang 48 anyos nga pulis nga ginlamposan sang tubo sa ulo samtang ginabulong man ang suspek nga natirohan sa tiil sang nagtuyo nga malagyo sa Luzuriaga Street, Central Market area, Barangay 12, Bacolod City, kaina alas- 7:50 sang aga.
Ang biktima amo ang police officer nga na-assign sa Bacolod City Police Office, naga-edad sang 48 anyos, kasado kag residente sang Barangay Sum-ag, Bacolod City, samtang ang suspek naman ginkilala nga si alias Juan, 56 anyos, single kag residente sang Barangay Bata, Bacolod City.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, may ginsaway ang pulis nga mga naga-inom inom sa kilid sang dalan sang hinali lang ini ginlamposan sang tubo sa ulo samtang nagatalikod.
Suno diri, nagtuyo pa nga malagyo ni Juan apang ginlaot ini sang pulis kag gintiro sa tiil.
Natigayon nga nadakpan si Juan kag sa karun ginabulong sa ospital ang pulis kag suspek.
Nahibaloan naman nga may yara sang warrant of arrest batok kay Juan apang indi ini matimingan sang kapulisan bangod kun kaisa lang ini magpakita sa lugar.
