Masobra sa 80 ka personnel sang LTO-Negros Island Region ang gindeploy agud magbantay sa byahe sa rehiyon subong nga holiday season.
Sa interview sang Bombo Radyo Bacolod kay LTO-NIR Director Jeck Conlu, nag-umpisa sang Disyembre 20 ang ila deployment kag ini magalawig tubtob sa Enero 4, 2026.
Suno diri, may yara sang ginapatigayon nga roadside inspection, terminal inspection kag may yara man sila sang ginabutang nga help desk.
Ini agud masiguro nga safe ang public transportation kag ginasunod ang safety regulation sa dalanon.
Sa road safety inspection, ginatsekyar ang goma, head light, signal light, seat belt kag dokumento kun legal ang pagbyahe.
Sa karun, may isa pa lamang ka patrol ang LTO-NIR, kag sila magafocus sa ciudad sang Bacolod kag malapit nga banwa kag ciudad.
Pahayag ni Conlu, sa tion nga may yara sang makita nga nagabayolar sa layi sa dalanon, ireport ini gilayon agud madagdagan ini sang show cause order ukon mahimo nga marevoke ang driver’s license sang drayber.
