Arestado ang isa ka persona magabisita kuntani sa iya abyan nga priso sa Negros Occidental District Jail (NODJ)-Male Dormitory sa Bago City matapos makuhaan sang ginapatihan nga illegal nga druga kahapon, Disyembre 23, 2025.
Sa interview sang Bombo Radyo Bacolod kay Jail Senior Inspector Atty. Juniven Umadhay, spokesperson sang Bureau of Jail Management and Penology- Negros Island Region (BJMP-NIR), ginpahibalo sila sang NODJ nga may yara sila sang na-intercept nga isa ka lalaki nga nakuhaan sang duha ka sachet sang suspected shabu kag isa ka sachet sang suspected marijuana.
Suno kay Umadhay ang mga ginapatihan nga illegal nga druga ang ginbutang sang suspect sa kalan.
Pahayag sini nga ang priso nga bisitahon sang lalaki ang napriso bangud man sa kaso nga paglapas sa Republic Act 9165 ukon Comprehensive Dangerous Drugs Act of 2002.
Suno kay Umadhay madamo sang pamaagi nga ginahimo ang pila ka mga nagabisita sa NODJ agud makapalusot sang kontrabando.
Ang arestado nga persona ang napriso na kag natalana pasakaan sang nagakaigo nga kaso.
Nagpanugyan si Umadhay nga dapat mahangpan sang mga nagabisita sa NODJ nga ang paghugot sang seguridad ang para man sa order kag katawhayan sang prisuhan.
