Narecover sang duha ka personnel sang Bacolod City Legal Office ang duha ka plastic container sang gina-alegar marijuana sa Galo-Locsin Street, Brgy 22, Bacolod City.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 1, samtang on-duty kag nagapatrolya ang duha ka City Legal employees kapin alas-11:00 sang gab-i, namutikan nila ang itom nga plastic bag nga kaangay sang ginagamit sa parcel delivery nga yara sa kilid sang dalan.
Sang ginbuksan, didto nakit-an ang duha ka containers nga naga-unod sang gina-alegar dried marijuana leaves.
Gilayon man nila nga ginturn-over ang ginapatihan marijuana sa Bacolod Police Station 1.
Agud makumpirmar kun marijuana gid man ang napulutan, ini ang ginpadala sa Crime Laboratory para sa eksaminasyon, kag sa karun ginahulat na lamang nila ang resulta.
Gintsekyar man sang kapulisan ang CCTV footage sa area, apang indi malab-ot ang lugar kun sa diin nakuha ang mga ginapatihan marijuana.
Ginalantaw ni Tolentino nga ini ang indi hungod nga ginbilin, sa baylo nawigit lamang sa dalan.
