Ginpang-rescue sang Department of Social Services and Development (DSSD) ang mga badjao nga liwat nagdagsa sa ciudad sang Bacolod kahapon, Disyembre 26.
Sa interview sang Bombo Radyo kay Anjanette Servano, Focal Person sang Anti Mendicancy Task Force, matapos ang ginpatigayon nga monitoring, sila ang nakarescue na sang tatlo ka mga badjao.
Madumduman nga sang nakaligad nga duha ka bulan, ginpapauli na ang mga Badjao, nga gindul-ong mismo sang DSSD sa Zamboanga, apang ang mga ini ang nagbalik gihapon.
Suno kay Servano, nakita nga madamo gihapon sang mga nagahatag sang limos sa mga badjao sa tion sang Paskwa rason nga sila ang nagalapta naman sa ciudad.
Gin-athag sang DSSD, nga sila ang mangin estrikto na bangud makapila naman sila nga naghatag sang warning.
Dugang pa sini nga sa pagdul-ong sa mga badjao sa Zamboanga, ginhambalan naman ang mga ini nga indi na magbalik pa sa ciudad.
Ginpahanumdom man sa ila nga kun magbalik, kuhaon na ang ila mga kabataan nga ginagamit sa pagpanglimos.
Kasunod sa monitoring sa ciudad sang Bacolod, nahibaluan nga nagsaylo naman ang mga ini sa ciudad sang Talisay bangud sila ang nahadlok na nga kuhaon ang ila mga kabataan.
May warning naman sa mga ini nga sa masunod indi na mangin maayo ang pagtratar sa ila.
Ginalauman nga antes matapos subong nga tuig, makuha na ang mga badjao./
