Pilason ang isa ka construction worker matapos ginlaslas sa li-og sang iya mismo nga katrabaho bangud sa gina-alegar nga paghurikap sa Sitio Moning, Barangay Cabadiangan, Sipalay City sang Enero 11.
Suno sa impormasyon nga nakuha sang Bombo News Team, ginkilala ang biktima nga si Mark Talaver, 37-anyos, residente sang Purok 6, Barangay 5 sa Sipalay City samtang ang suspek naman ang ginkilala nga si Christopher Ma-alat, 26-anyos, residente sang Barangay Cabadiangan.
Base sa report sang Sipalay City Police Station(CPS), boluntaryo nga nagsungka ang suspek sa police station kag gin-ako ang paglaslas sang li-og sang biktima.
Nahibaluan nga ang asawa ni Ma-alat ang nagpanugid sa iya nga ginhukirap siya ni Talaver sa pribado nga bahin sang iya nga lawas.
Ini ang nangin rasun ni Mala-at sa paglaslas sang li-og ni Talaver gamit ang binangon nga nagtuga sang pagkapilas sini sang iya nga liog.
Gilayon naman nga gindala si Talaver sa Sipalay City Infirmary para sa nagakaigo nga pagbulong kag yara na karon sa estable nga kondisyon.
Sa karun, yara na sa kustodiya sang kapulisan si Ma-alat para sa nagakaigo nga disposisyon.
