Naka-estorya na ang Department of Social Welfare and Development – Negros Island Region sa Mabinay Municipal Government sa Negros Oriental, sa plano nga pagdonar sang lima ka ektarya nga duta.
Ang duta ang plano nga tukuran sang Regional Facility sang DSWD – NIR.
Sa interview sang Bombo Radyo Bacolod kay DSWD NIR Director Erwin Razo, ginahulat nalang nila nga magpirmahanay sang deed of donation.
Ang nagapanguna nga itukod sa duta amo ang Bahay Pag-asa.
Ini ang pagahamtangan sang mga children in conflict with the law ukon ang mga menor de edad nga nakabayolar sa layi.
Sila ang tenporaryo nga magatinir sa area para sa rehabilitasyon tubtob nga handa na nga magbalik sa komunidad.
Kasunod sini, magatukod man sang iban pa nga pasilidad para sa mas madamo nga programa ukon regional recreation activities nga makabulig sa mga kabataan nga makabig biktima sang sirkumstansya.
Target nga mapatigayon ang ground breaking activity sa bulan sang Pebrero.
