Padayon ang search and rescue operation sang Philippine Coast Guard sa apat ka missing crew members sang cargo ship nga M/V Devon Bay nga naglugdang sa Agno Bay sa Pangasinan sang Enero 23.
Narescue sang China Coast Guard ang 17 gikan sa 21 ka crew members sang barko kag sila ginturn-over sa Philippine Coast Guard.
Apang sa 17 ka crew members, may duha nga ginbawian sang kabuhi.
Ang mga nakaluwas naturn-over na sa Department of Migrant Workers kag Bureau Of Quarantine.
Sa interview sang Bombo Radyo kay Capt Noemie Cayabyab, spokesperson sang Philippine Coast Guard, padayon ang ila search and rescue operations bangod dako ang ila pagpati nga buhi pa ang apat nga namissing.
Suno diri, may yara sang ginapatigayon nga surface kag aerial search kasubong man nga may radio broadcast na sila sa mga barko nga nagalabay sa area agud mareport gilayon kun may yara man sang masiplatan nga survivors.
Suno kay Cayabyab wala nila ginpaidalom sa search and retrieval ang operation bangod dako ang tsansa nga makit-an pa ang apat ka missing nga maayo ang kahimtangan.
Pahayag sini, santo sa impormasyon nga ila nakuha, matapos magdeklarar ang kapitan nga i-abandona na ang barko, dungan sila nga nga nagbiya sa cargo ship tubtob nga naglapta na sila.
Ang apat nga namissing ginalakipan sang duha ka residente sang probinsya sang Negros Occidental nga amo sanday Captain Elimar Jucal nga tumandok sang banwa sang San Enrique kag thirdmate Jejanfer Partosa Marfa nga residente sang cuidad sang Cadiz, samtang ang duha ka missing naman amo ang third engineer kag oiler sang barko.
