Nagpabutyag ang Negros Occidental Provincial Government kag ang bilog nga Negrense community sang pag-unong sa pamilya ni Captain Elimar Jucal sang San Enrique kag ni Jejanfer Partosa Marfa sang Cadiz City, subong man sa mga pamilya sang iban pa nga mga crew member sang M/V Devon Bay nga sa karon padayon pa nga ginapangita matapos ang insidente sa dagat sang Enero 23.
Nahibaluan nga may kabug-usan nga 21 ka crew member ang amo nga barko kun sa diin duha ang napatay kag na-rescue ang 15 sang search and rescue teams upod ang China Coast Guard (CCG).
Samtang, apat pa ang nagapabilin nga missing nga ginalakipan nanday ship captain Jucal, third mate Marfa, third engineer kag isa ka oiler.
Sa interview sang Bombo Radyo kay Negros Occidental Governor Eugenio Jose “Bong” Lacson, nagalaum siya nga makita kag ma-rescue na sang mga otoridad ang na-missing, kag nagapasalamat man siya sa mga nag-rescue sa pila ka mga crew sa nasambit nga barko.
Suno kay Lacson, makig-angut ang provincial government sa Philippine Coast Guard (PCG) agud nga makakuha ang update sa mga namissing.
Suno diri, wala pa siya nakapakig-angut sa mga Negrense crew nga narescue.
Ginapanawagan sang Provincial Government ang tanan nga mga otoridad kag mga maritime stakeholder nga ipadayon kag pabaskogon pa gid ang search and rescue operations para sa mga nagapabilin nga missing.
