Bukas ang complainant nga nagreklamo sa overloading sang modernized jeepney nga magtambong sa hearing sa Pebrero 3 apang nagapangayo lamang ini sang proteksyon.
Madumduman nga ginpost ni Nida Gallunon Orduyo sa social media ang video nga nagasakay ini sa modernized jeepney kaupod ang iya apo kag ang sulod sang jeep nagaginutok na sa pasahero.
Nag-ayo ini sa konduktor nga untaton na ang pagpasaka sang pasahero apang ginsabat ini sang konduktor nga manaog na lang ini agud mabuslan sang iban ang iya bangko.
Samtang, wala man ginhatagan si Orduyo sang discount sa plete bisan nga senior citizen ini kag estudyante ang iya apo.
Sa interview sang Bombo Radyo kay Orduyo sa Ipa-Bombo Ta Segment, luyag lamang sini nga mapahibalo ang ini nga problema agud mahatagan sang solusyon.
Suno diri, ginapanawagan sini sa mga operator sang modernized jeep nga siguraduhon nga napaidalom sa seminar ang mga drayber kag konduktor antes sila pahanugotan nga magbyhe.
Pahayag ni Orduyo, bukas ini nga magtambong sa hearing apang nagapangayo lang ini sang proteksyon sa kabalaka nga wala sini nahibaloan kun ano ang mahimo mapinsar sang konduktor nga iya ginreklamo.
