Nagpanugyan ang hepe sang Bayawan City Police Station sa mga naga-drive nga tsekyaron anay ang ila nga kaaugalingon kag ang ila nga salakyan antes mabyahe sa dalanon.
Ini kasunod sa pagkahulog sang mini dump truck nga ginasakyan sang mga government employees kag isa ka On the Job Training (OJT) student sa Sitio Mansintak, Brgy. Kalamtukan, Bayawan City, Negros Oriental kahapon alas-11:10 sang aga.
Sa interview sang Bombo Radyo Bacolod kay Police Lt Col. Joeson Parallag, hepe sang Bayawan City Police Station, ginkumpirmar sini nga siyam ang napatay sa nasambit nga aksidente.
Ang driver ang ginkilala nga si Egmedio Arnaiz samtang ang mga sakay naman amo sanday Diomedes Canoy, Kervin Andog, Larry Llamos, Ronel Cabasag, Jonathan Hamor, Jovanie Babor, Jonaryl Caguisa, lunsay mga empleyado sang City Agriculture Office – Engineering Division kag ang isa ka OJT student nga si Warren Aseniasa.
Suno diri, may karga nga lima ka container sang crude oil ang dump truck kag paglab-ot sa Sitio Mansintak, Brgy. Kalamtukan, nahulog ini sa pil-as.
Ang mga biktima nakaagom sang multiple physical injuries nga gilayon gindala sa Kalumboyan Hospital apang gindeklarar nga dead on arrival.
Suno kay Parallag, ginalantaw nga nadulaan sang brake ang driver rason nga nag-overshoot ini sa madalom nga pil-as.
Suno diri, kuhaon sang mga otoridad ang salakyan para sa imbestigasyon, agud mausisa ang rason sang aksidente.
Sa karun, ginahulat nalang nila ang resulta sang post-mortem examination sang mga biktima agud matumod ang kabangdanan sang ila kamatayon.
