Nagbilin sang mensahe si Police Colonel Joeresty Coronica para sa magabulos nga Bacolod City Police Office Director sa ginpatigayon nga turnover of command ceremony kahapon.
Nagpabutyag sang pagpasalamat si Coronica, kag pagsalig sa bag-o nga city director nga si Police Colonel Eugene Rebadomia para sa padayon nga pag-uswag sang kapulisan sa Bacolod City.
Nahibaluan nga si Rebadomia ang napilian bilang bag-o nga BCPO Director, gikan sa napulo ka aplikante para sa pwesto.
Si Rebadomia amo na ang ikalima nga BCPO Director nga residente sang Barangay Mansilingan, Bacolod City.
Pahayag sini, apisar magabaylo ang liderato, padayon nga nagapabilin ang ila paghiusa sa pagpanguna sang Police Regional Office – Negros Island Region.
Ginpasalamatan man niya ang kahigayunan nga makaserbe sa katawhan kag suno diri siya ang nagabiya nga tuman ang pagpasalamat kag kalipay.
Ginpanawagan man niya ang padayon nga pagbinuligay sang tanan para sa mas luwas kag malinong nga komunidad.
Si Coronica man ang nagbatun sang award para sa BCPO bilang Best City Police Office sa Police Regional Office-Negros Island Region (PRO-NIR) sa ginpatigayon nga PNP Day 2026 Celebration sa Kanlaon Hall, Camp Alfredo Montelibano, Barangay Estefania, Bacolod City, sa kaangay nga adlaw.
