Wala ginakabig nga peligro sa karon ang natukiban nga sinkhole sa Barangay General Luna, banwa sang Toboso, Negros Occidental, bangud yara ini sa bukid nga bahin kag malayo sa mga pamalay.
Sa interview sang Bombo Radyo kay Mayor Richard Jaojoco, alkalde sang Toboso, wala sang pumuluyo nga apektado sa nasambit nga lugar.
Ginpahayag niya nga ang usmod ukon hollow sa duta posible may koneksiyon sa paggiho sang East Negros Faultline nga nagaagi sa tunga sang Toboso kag Calatrava.
Ang area ang yara man malapit sa national highway kag padayon nga ginabantayan sang lokal nga panguluhan agud mahibaluan kun may dugang pa nga movement.
Suno kay Jaojoco, nagpakig-angot na ang banwa sa Provincial Disaster Risk Reduction and Management Office (PDRRMO) kag ginaplano man nga ipa-tsekyar sa National Geohazard Program (NGP) ang kahimtangan sang sinkhole para sa dugang nga assessment.
Ginpabutyag sang alkalde nga padayon ang pagbantay sa lugar agud masiguro ang kaluwasan sang komunidad.
