Suguran na sa masunod nga semana ang pagtukod sang Modular Shelter Units sa Brgy Talaptap, La Castellana, Negros Occidental kag Brgy Binalbagan, Canlaon City, Negros Oriental para sa mga pumuluyo gikan sa 4km Permanent Danger Zone sang Bulkan Kanlaon.
Sa interview sang Bombo Radyo Bacolod kay Office of the Civil Defense – Negros Island Region Director Donato Sermeno III, matapos sang nagluntad nga Moderately Explosive Eruption kahapon, wala naman sang narecord nga iban nga volcanic events.
Apang naapektuhan sang minor ashfalls ang Bago City, Pontevedra, La Carlota City, La Castellana, Hinigaran kag Valladolid.
Luwas sa mga nagbakwit bangod sa paglupok sang Bulkan, may-ara naman sang 131 ka indibidwal gikan sa sulod sang 4km Permanent Danger Zone nga yara na ngadaan sa mga evacuation centers.
Suno kay Lacson, magatukod na ang Department of Human Settlements and Urban Development (DHSUD) sang Modular Shelter Units sa masunod nga semana, kag prayoridad diri ang mga gikan sa 4km PDZ sang summit crater sang Bulkan.
Ang pondo ang gikan sa national government, kag sa karun ginafinalize na lamang ang mga dokumento para mapatigayon na ang mga programa, projects kag activities sa idalom sang Kanlaon Recovery and Development Plan.
Padayun ang pahanumdom sang OCD-NIR sa mga pumuluyo malapit sa Bulkan Kanlaon nga mag-aligmat kag magkoordinar sa mga local officials, kag gilayon nga magsunod kun may panugyan sang evacuation.
