Nagmando si US President Donald Trump sa Pentagon kag iban pa nga US government agencies nga suguran na ang proseso sang pagtumod kag paghayag sa publiko sang mga dokumento nga naangut sa mga alien, extraterrestrial life, unidentified aerial phenomena (UAP), kag unidentified flying objects (UFOs).
Suno kay Trump, nahibaluan niya nga madamo ang interesado angut diri gani nagdesisyon sia nga ipagwa ang mga files nga ginauyatan sang gobyerno.
Madumduman nga nangin mainit nga topiko sa social media ang komento sang ginbuslan ni Trump nga si former US President Barack Obama matapos ini ginpamangkot sang podcast host nga si Brian Tyler Cohen kon matuod gid man bala ang mga alien.
Nagsabat si Obama nga matuod ini apang wala niya pa makita ang amo nga mga tinuga.
Gin-akusaran naman ni Trump si Obama nga nagbuyagyag sang “classified information”.
Sang 2024 report, ginpahayag sang Pentagon nga wala sang ebidensya nga naka-engkwentro ang US government sang alien life kag kalabanan sa nakit-an nga UFO ang ordinaryo nga mga butang lamang.
