Gin-call out sang TV host nga si Boy Abunda ang anay aktor nga si Alvin Aragon angot sa iya mga komento parte sa queer community.
Gin-ako man ni Abunda nga indi na kuntani niya luyag mag-engage sa isyu apang madamo ang nagapangayo sang iya opinyon bangud isa man siya sa pinakakilala nga personalidad nga miyembro man sang LGBTQ+.
Madumduman nga ginkwestyon ni Aragon sanday Gloc-9, Ian Veneracion, kag K Brosas bangud sa pagbaton nila sa ila mga kabataan nga miyembro sang LGBTQ+.
Pahayag sang TV host nga daw kaangay nga ginapakita ni Aragon nga mas eksakto ang iya pamaagi sa pagpadako sang iya bata kun ikumpara sa mga ginikanan nga nagasuporta sa ila mga kabataan nga miyembro sang LQBTQ+.
Ginpaathag ni Abunda nga wala sang bisan sin-o ang magahusga sa isig katawo kag indi dapat sini ipilit ang iya ginpatihan kag iya kaugalingon sa iban nga tawo.
Suno diri, indi nagakahulugan nga tanan nga miyembro sang LGBTQ+ ukon ang mga ginikanan nga nakapalangga sang matuod-tuod sa ila mga kabataan ang makadto sa impyerno.
Nagapati si Abunda nga ang iya ginapatihan nga Diyos ang mabuot, maintindihon kag makita ang iya nga tagipusoon.
