Gindala sa korte ang isa ka lalaki matapos ginreklamo sang iya bata nga lalaki nga naga-edad sang 10 bangod gingasto sang amay ang kwarta nga ginsupot sang bata kag nagpamalibag ini nga ibalik ang kwarta.
Ang insidente natabo sa China matapos magbulagay ang ginikanan ni Xiaohui kag nag-upod ini sa iya amay.
Kun may mabaton nga red envelope money si Xiaohui, ginahatag sini sa iya amay ang kwarta nga amo naman ang nagadeposit sa bangko.
Apang, may nakilala ang iya amay nga bag-o nga babayi kag nagdesisyon ini nga liwat nga magpakasal samtang si Xiaohui naman ginpadala sa iya iloy.
Matapos ang kasal, natukiban sang iloy ni Xiaohui nga ginwithdraw sang iya anay bana ang tanan nga kwarta sang ila bata para gamiton panggasto sa kasal.
Ginkompronta ni Xiaohui ang iya amay kag nagdemand nga bayaran siya.
Apang nagpamalibag ang amay kag naghambal nga ibalik sini ang kwarta kun yara na sa husto nga edad si Xiaohui.
Nagdesisyon si Xiaohui nga dal-on sa korte ang iya amay kun sa diin nagrason ini nga yara pa sa iya kinamatarong ang pag-uyat sang kwarta sang iya bata kag ginaduso sini nga ginasulsolan lamang ang bata sang iya iloy.
Apang suno sa korte ang matood nga nagapanag-iya sang kwarta amo si Xiaohui kag ginmandoan ang amay nga ibalik ang kwarta lakip na ang interest nga nagdangat sa P696,350.
