Nagapanawagan ang ship captain kag consultant sang manning agency sa gobyerno nga maghimo sang kongkreto nga tikang agud mabuligan ang mga Filipino seafarer nga yara sa anchorage sang Iran.
Sa interview sang Bombo Radyo Bacolod kay Captain Edgardo Flores, consultant sang Eastern Mediterranean Manning Agency Incorporated, halos tanan nga crude oil nga gina-export gikan sa Middle East ang nagalabay sa Strait of Hormuz antes maggwa sa Persian Gulf.
Suno diri, ang Strait of Hormuz ang makitid nga alagyan kag yara sa control sang Iran.
Una na nga nagpaandam ang Iran nga atakehon nila ang sin-o man nga maglayag sa Strait of Hormuz.
Sa eksperyensya sini sang 1980s sa gyera sang Iran kag Qatar, madamo sang mga ginbombahan nga barko sa Strait of Hormuz kag tuman ka damo sang casualties.
Suno diri, may-ara sang marine traffic, kag nakita nga may ara sang 50 ka vessels nga naka-anchor sa Iran.
Panawagan sini nga kinahanglan sang contingency plan, ilabi na ang pinakadako nga problema amo ang safety sang mga crew kasubong man ang supplies kaangay sang pagkaon.
Suno diri, indi makapasulod sang supplies provision sa area, gani hingyo sini sa Department of Migrant Workers nga ayuon ang mga shipowner nga ipullout sa anchorage ang mga barko kag isaylo sa safe nga lugar.
Aminado ini nga may otoridad man ang ship captain nga ini ang himuon, apang lain gid kun ang gobyerno ang magrequest sa mga shipowner.
Panugyan sini nga isaylo anay ang barko sa safe grounds tubtob nga magkanay na ang sitwasyon kag sarang na nga makaload ukon unload sang mga supplies kag kun magbukas na ang Strait of Hormuz.
