Ginpamatud-an sang team sang Negros Occidental Basketball Elementary Boys nga bilog ang bola matapos nga magkampeon sa Negros Island Regional Athletic Association Meet 2026.
Sa interview kay Zion Casibo, ang team captain apisar nga malayo ang abanse sang Bacolod City nga gintinguhaan nga mabadbad ini kag madaog ang hampang.
Suno kay Casibo, panugyan sini sa iya nga teammates, “Never give up! Kon indi ma-shoot kag ma-steal, bawi dayun depensa!”.
Apisar nga siya ang pinakagamay sa team, wala ini nagkulang sa pag-motivate sa iya mga kaupdanan sa tunga sang makahalawat-hawat nga hampang para sa championship batok sa Bacolod City.
Ang mga players ang nagikan sa Bubog Elementary School sa Talisay City.
Ginhalad naman ni Casibo ang iya gold medal kag kadalag-an sa iya iloy kag amay nga nagasuporta sa iya.
Samtang wala man nakaupang ang kapigaduhon kay Joshua Nemenzo, selected player sang Negros Occidental Basketball Boys, gikan sa Barangay Cansilayan Murcia, Negros Occidental sa paghampang sa NIRAA Meet 2026.
Dako ang pagpasalamat sini sa iya nga mga ginikanan nga nagsuporta sa iya.
Suno kay Nemenzo, apisar nga pigado ang ila nga sitwasyon ginatinguhaan sang iya mga ginikanan nga masuportahan siya sa iya practice.
Halin sa banwa sang Murcia, nagabiyahe pa ini padulong sa ciudad sang Talisay agud nga magtraining.
Ang pamilya man sini ang dako nga inspirasyon sa maayo nga hampang agud nga makahampang sa Palarong Pambansa.
Suno sa iya nag-absent sa trabaho iya amay, samtang ang iya iloy kag mga utod nagpaninguha gid agud makatambong kag makalantaw personal sa iya hampang, nga nagpreparar pa sang tarpaulin banner.
Nangin emosyonal ang mga ini matapos magdaog batok sa Bacolod City sa score nga 68-65.
Nagpasalamat man ini sa Murcia Municipal Government, kay Mayor Gerry Rojas, sa Cansilayan Elementary School, kag sa iya coach nga naggiya sa iya.
Sa karon, excited na ini nga magpreparar sa Palarong Pambansa nga pagahiwaton sa Agusan Del Sur.
