Ginapasalamatan sang reigning Lin-ay sang Salvador Benedicto ang pageantry nga nangin palaagyan agud nga madevelop sini ang iya nga personalidad.
Sa interview kay Jamaicah Bantigue, ginpahayag sini nga ang iya nga pageant journey ang nag-umpisa sa eskwelahan.
Suno kay Bantigue, sang 16 anyos ini gin-engganyo siya sang iya nga manunudlo nga magpasakop sa pageant sa ila eskwelahan.
Aminado man ini nga may mga pangduha-duha siya sa iya kaugalingon apang sa pihak sini iya nga gintestingan ang pagpasakop kag didto na nag-umpisa ang pageant journey sini.
Suno diri, siya ang second runner sa beauty with a purpose competition sa Western Visayas.
Ginpahayag man sini nga bangud sa pageant na develop ang personalidad sini.
Isa sa iya na-overcome sa pagpasakop sa pageant amo ang stage freight nga natural lamang.
Dugang pa madamo man ini sang mga kabudlayan nga naengkwentro kag isa na diri ang finances apang wala ini nakaupang sa iya paghimo sang mga butang nga makapaayo sa iya isig katawo.
Sa pagpasakop sini bilang Lin-ay sang Don Salvador Benedicto kag sa karun naga-uyat sang korona, luyag sini ipakita nga ang mga tumandok sang Don Salvador Benedicto ang may talento.
Samtang ginpatukod man sini ang iya nga clinic ang “YOU MATTER” bangud man ginapangatubang sini nga pagtilaw kun sa diin nadula ang iya duha ka mga mga pinalangga sa kabuhi bangud sa mental health issues.
Ini nga clinic ang may tinutuyo nga makabulig sa mga tawo nga may ginapangatubang mental health issues.
Handum man sini nga maabot ang tion nga ang probinsya sang Negros Occidental ang may kaugalingon nga mental health facility.
Ginpasalamatan sini ang tanan nga nagsuporta sa iya pageant journey.
