Patay ang 17 anyos nga dalagita matapos gin-alegar linampusan sang tubo sang kaugalingon nga amay kahapon alas-9:50 sang aga, Marso 09, 2026 sa Fortuneville Subd., Brgy. Rizal, Sagay City, Negros Occidental.
Ginkilala ang biktima nga si Precious Herry Balicuatro, 17 anyos, samtang ang suspek amo si Joedin Braza, 41 anyos, kasado, tricycle driver, kag lunsay mga residente sa lugar.
Sa interview sang Bombo Radyo Bacolod kay Police Lt. Col. Alvimar Flores, hepe sang Sagay City Police Station, ang biktima ang magalakat na kuntani sa eskwelahan sang natabo ang krimen.
Suno kay Flores, may yara na nga daan sang indi paghangpanay sa tunga sang mag-amay.
Ang suspek kag ang biktima ang nagapuyo sa isa ka compound apang ang dalagita ang nagatulog sa balay sang iya nga grandparents kag sa pamilya sang iya amay.
Bulagay na ang mga ginikanan sang dalagita, kun sa diin ang iloy ang yara sa karun sa Cebu.
Ang iloy sang dalagita ang ika-tatlo na nga napangasawa sang iya nga amay.
Suno sa hepe, bangud nga separado na ang mga ginikanan, ang biktima ang masami nagalagaw kag gab-i na nagapauli.
Masami man nga nagabaisay ang mag-amay.
Suno kay Flores, sa ila nga pagpangusisa ginpahayag sang paryente sang suspek nga wala ini nagatulog sa sulod na sang isa ka semana.
Pahayag sini nga sadto may-ara sang ginatumar nga bulong para sa depression ang amay.
Kahapon sang aga, hinali lang nga ginbutong sang suspek ang biktima kag gindala sa kwarto.
Nabatian pa sang lolo nga nagasinggitan ang dalagita, kag ini ang gilayon man nga nagpadulong sa Sagay City Police Station.
Nagresponde man gilayon ang mga kapulisan, apang pag-abot sa lugar wala na ang mga ini sang may nabatian nga tingog.
Ginpwersa sang mga kapulisan nga masulod ang kwarto, kag didto na nakita ang biktima nga nagahigda sa kama samtang nagapaligo sang kaugalingon nga dugo.
Ang amay ang nagapungko naman sa kama kag nagakaurungan.
Gindala pa sa ospital ang biktima apang gindeklarar nga dead on arrival, matapos mag-agom sang pilas sa ulo.
Samtang ang suspek ang yara na nakahunong sa Sagay City Police Station.
Ginalantaw nga mahimo ginsabat sang biktima ang amay kag ini ang nangutos rason nga ginlampusan sini ang iya bata.
Ginapreparar naman sang mga kapulisan ang mga dokyumento agud nga ipasaka ang kaso batok sa suspetsado.
