Nasapwan ang isa ka lalaki nga wala na sang kabuhi sa Hda. Otilia Lacson, Brgy. Efigenio Lizares Talisay City, Negros Occidental, kaina alas- 5:45 sang kaagahon.
Ang biktima ang ginkilala nga si Jayvee Geronica Arellano alyas ‘Jaja’, residente sang Hermilinda Homes, Brgy Mansilingan, Bacolod City.
Sa interview sang Bombo Radyo sa mangunguma nga si Agnes Isog, matrabaho ini kun tani sa kampo sang nakit-an sini ang nagakaya nga tawo.
Suno diri, sang ginpalapitan sini ang persona, nakita niya nga dugoon ang tawo kag wala na sang kabuhi.
May pilas ini sa nawong nga kaangay nagabanog ang mata kag baba kag may nagatulo nga dugo sa ilong kag baba sini.
May pilas man ini sa sulok-sulok nga kaangay inagyan sang patalom.
Samtang, nagasuksok ang biktima sang bayo nga nagaduag sang itom, maong nga dilargo, kag kalo nga puti apang wala sang tsinelas ukon sapatos.
May tattoo ini sa natoo nga kamot nga “Try and fail, But dont fail to try”, samtang ang tattoo naman sini sa nawala nga kamot amo ang espada nga krus, sa abaga may tribal nga tattoo, sa pulso may magamay nga ribbon kag sa likod may tattoo nga kaangay nga tawo.
Suno pa kay Isog, nakita sini sa area nga may marka nga kaangay ginguyod ang biktima kag ginbilin lamang didto.Samtang, nakilal-an na ang lalaki nga nasapwan nga wala sang kabuhi sa Hda. Otilia Lacson, Brgy. Efigenio Lizares Talisay City, Negros Occidental, kaina alas- 5:45 sang kaagahon.
Ang biktima ang ginkilala nga si Jayvee Geronica Arellano alyas ‘Jaja’, residente sang Hermilinda Homes, Brgy Mansilingan, Bacolod City.
Madamo sang reklamo batok kay Arellano sa ginahimo sini nga pagbaligya sang salakyan nga indi man iya.
Sang Enero, 2026 may yara sang reklamo kay Arellano matapos ini mangutang sang masobra P100,000 kag gingamit sini pangcollateral amo ang salakyan nga indi man siya ang nagapanag-iya.
May nabiktima man si Arellano matapos ginprenda sini ang Toyota Vios nga indi man iya apang nahimo nga mabawi sang matood nga nagapanag-iya.
Samtang, sang Nobyembre 2025, may narekober nga Toyota Avanza sa Barangay Looc , Dumaguete City, Negros Oriental nga yara sa possession ni Rosalio Nahial Castillo nga residente sang Cagayan de Oro City apang ang salakyan napangalan kay Claudio Catigan Dela Cruz sang Mina, Iloilo kag ginapanag-iyahan ni Mr Pantilla.
Suno kay Castillo, nabakal sini ang salakyan kay Jaja Arellano ang Toyota Avanza sa balor nga P120,000 kag nagbayad ini sang P90,000 bilang inisyal installment.
Apang wala sang may maipakita si Castillo nga mga dokumento para mapamatood ang natabo nga transaksyon, amo nga boluntaryo sini nga ginsurender ang salakyan sa Provincial Highway Patrol Unit- Negros Oriental.
