Ginalantaw nga lansihanay sa illegal nga droga ang rason sa pagpatay sa 32 anyos nga lalaki sa Bangga Adam, Barangay Pahanocoy, Bacolod City sang Marso 5.
Madumduman nga ang biktima nga si Wilson Borda alyas Tonton, 32 anyos, residente sang Prk Rojas, Brgy Tangub, Bacolod City, nasapwan nga wala sang kabuhi sa Barangay Pahanocoy.
Sa interview sang Bombo Radyo Bacolod kay Bacolod City Police Office Director Police Col. Eugene Rebadomia, natukiban nga involved si Borda sa insidente sang pagpanghold up sa ciudad kag ang kaupod sini ang nadakpan sadto sang City Drug Enforcement Unit.
Nakumpiskar sa iya kaupod ang kapin 30 gramos sang illegal nga druga, armas luthang kag motorsiklo nga ila ginkawat nga ginagamit nila sa pagpanghold up.
Suno kay Rebadomia, posible ginbakol si Borda kag ginlamposan sa ulo bangod ang pilas sini sa paa tubtob sa tiil kaangay nga nakakas na ang iya panit.
Samtang, may nakita man nga pilas sa liog kag lawas ni Borda tuga sang pagpamuno.
