Masobra isa ka gatos nga fuel stations sa ciudad sang Bacolod ang natalana nga i-inspect sang Bacolod City Government.
Sa interview sang Bombo Radyo Bacolod kay Bacolod City Mayor Greg Gasataya, nagpatigayon sila sang meeting sa pila ka mga departamento sa ciudad sang Bacolod bilang preparasyon sang ciudad sa pagsaka sang presyo sang produktong petrolyo.
Suno kay Gasataya, naghanda na ang Bacolod City Government sang team agud nga magpatigayon sang inspection sa tanan nga mga fuel stations sa ciudad.
Suno diri, may inisyal naman sila nga koordinasyon kahapon sa Department of Energy kag subong nga adlaw may yara sila sang final briefing.
Ang monitoring team ang pagabug-usan sang personnel sang Bacolod City Mayor’s Office, City Treasurers Office, Permits and Licensing Office, Bacolod City Legal Office kag Communications Office kag magaupod man diri ang personnel sang Bacolod City Police Office.
Sa tion nga matapos subong nga adlaw ang final briefing sang DOE, gilayon nga magaumpisa ang monitoring team sa pagbisita sang fuel stations.
Igarecord sang mga ini ang mga detalye kaangayu sang pangalan sang fuel station, exact location, petsa kag oras sang pagbisita, fuel supply reports nga may mga litrato, ila nga obserbasyon sa mga nagabakal kag mga written statements ukon paathag gikan sa station management kun kinahanglan.
Suno kay Gasataya sa ciudad sang Bacolod sa data nga ginpagwa sang Business Permits and Licensing Office may yara sang 134 ka nag-apply sang permit kag 51 na ang naissuehan sang business permit.
May yara ang mga ini sang tubtob sa katapusan sang Marso sa pagproseso kag pagtapos sa business permit renewal nga wala sang penalidad.
