Nagpahanumdom ang Highway Patrol Group (HPG) sa mga nabiktima sang modus operande sa pagpangawat sang mga salakyan.
Pahanugyan sang HPG sa mga biktima nga magpalapit agud mabuligan sa pagrekober sang ila mga salakyan kag sa pag-file sang kaso batok sa mga imbolbado sa pagpang-scam.
Sa interview sang Bombo Radyo Bacolod kay Police Lieutenant Edwin Santos, Chief Investigator sang HPG-NIR, ginpahayag sini nga lapnagon ang grupo sang ini nga modus.
Sa pihak sini, ang pila sa mga biktima ang padayon sa gihapon nga nagapangita sang ila mga salakyan apang suno sa ila, nagakadulaan na sila sang paglaum nga marekober pa ang ila salakyan.
Suno kay Santos, ang kadam-an sang mga salakyan nga ginabaligya sa amo nga modus ang masami wala sang nagakaigo nga papeles ukon peke ang dokumento.
Suno diri, mas maayo nga tsekyaron gid kag usisaon anay ang background sang salakyan antes magbakal, ilabi na kun ini secondhand kag mahimo man magpangayo sang bulig sa HPG kag Land Transportation Office (LTO) agud maverify ang history sang salakyan.
Madumduman nga may yara sang nasapwan nga bangkay sa Talisay City sang tinalikdan nga Martes nga gina-alegar isa ka myembro sang nagapang-scam sa nasambit nga modus.
