Ginahitso na ang dokumento para mapasakaan sang kaso ang tatlo ka suspek sa pagpatay sa anay Barangay Tanod sa Barangay 22, Bacolod City, sang Biyernes.
Ginkilala ang biktima nga si Ruben Altamira, residente sang Purok Gahili-ugyon, Barangay 23, Bacolod City, anay Barangay Tanod kag nagatrabaho sa nagabulante sang tela.
Samtang, ang tatlo naman ka suspek nga nadakpan amo ang mag-utod nga sanday alyas Jeremy kag alyas Junjun kag ang ila bayaw nga si alyas Jonathan.
Gin-ako ni Jeremy nga suspek ini sa pagluthang patay kay Altamira apang ginpanginwala naman ni Junjun kag Jonathan nga involved sila sa krimen.
Sa interview sang Bombo Radyo Bacolod kay Police Captain Efren Legada, station commander sang Bacolod Police Station 1, nagpahayag ang suspek nga indi sila ang nagapanag-iya sang armas-luthang kag ini ang ginhatag lamang sang iya bayaw.
Suno diri, nagatrabaho bilang mekaniko ang mga suspetsado amo nga gina-imbestigaran kun paano nga may yara sila sang KG9 kag 38 revolver.
Suno pa kay Legada, ginapatihan nga ang KG9 ang gingamit sa pagluthang kay Altamira.
Ipaidalom man sa crossmatching ang armas sa iban nga mga bullet slugs ukon basiyo sang bala sa iban nga estasyon.
Natalana nga pasakaan sang kaso nga murder kag paglapas sa Republic Act 10591 ukon Comprehensive Firearms and Ammunition Regulations Act ang tatlo ka mga suspetsado.
