Liwat naman nga naglupok ang Bulkan Kanlaon alas-6:07 ang takna subong nga gab-i, Marso 15.
Sa interview sang Bombo Radyo Bacolod kay Pearly Sianson, Science Research Specialist sang PHIVOLCS Kanlaon Volcano Observatory, nagpatigayon sang Moderately explosive eruption ang Bulkan kag ang plume ang nagdangat sa 5000 meters above the crater padulong sa southeast kag northeast nga direksyon ang ginbuga nga abo sang nasambit nga Bulkan.
Ang mga posible nga maapektuhan sang ash fall ang banwa sang La Castellana, San Carlos City kag Canlaon City.
Ginadumilian ang pagsulod sa 4-km Permanent Danger Zone (PDZ).
Nagapabilin sagihapon nga napaidalom sa Alert Level 2 ang bulkan.
Ginamonitor pa sa karun ang mga lugar nga naapektuhan sang ashfall.
Nagpahanumdom si Sianson sa mga pumuluyo nga magpabilin nga mag-aligmat kag magsuksok sang facemask kag kun mahimo magpabilin lamang sa sulod sang balay.
Madumduman ini na ang ikatatlo nga paglupok sang bulkan sini nga tuig kun sa diin ang una ang natabo sadtong February 19 kag ang February 26. Samtang, padayon ang monitoring sang Local Government Unit sang La Castellana sa sitwasyon sa lugar matapos liwat nga maglupok ang Bulkan Kanlaon kagab-i, Marso 16.
Sa interview sang Bombo Radyo Bacolod kay La Castellana Mayor Añejo Nicor, nagapadayon sila sa pagmonitor sa sitwasyon sa banwa kasunod sang paglupok sang Bulkan kag nagahulat man sila sang abiso sang National Disaster Risk Reduction Management Office kun kinahanglan nga i-evacuate ang mga residente nga apektado sang ashfall.
Ang mga naapektuhan sang ashfall amo ang Barangay Masulog, Biak na Bato, Cabagnaan, Mansalanao, Camandag, Manghanoy kag Nato.
Gin-abisuhan sang alkalde ang mga residente nga mag-aligmat, magsuksok sang facemask kag likawan ang magwa sa balay.
