Patay ang tatlo ka mga miyembro sang New People’s Army sa engkwentro batok sa 47th Infantry Battalion sa Prk Santol, Brgy Tampalon, Kabankalan City alas-4:00 kaina sang kaagahon, Marso 21.
Isa sa napatay ang pinuno sang South-Western Front (SWF) nga ginkilala nga si alyas Ritchie”Makoy” Verano kaupod ang duha ka miyembro sini nga sanday Milky alyas “Gorting” Sampini kag Joedil alyas “Junjun” Balsimo.
Sa interview sang Bombo Radyo kay LtCol. Dennis Martinez, Commander sang 47th IB, ang tatlo ka mga napatay nga miyembero sang NPA ang involved sa pila ka mga atrocities sa Negros Occidental lakip na diri ang sunog nga natabo sa Himamaylan City kag shooting incident sa Kabankalan City.
Suno kay Martinez, na-recover sa ila ang lima ka long firearms.
Dugang pa, ginabanta lima ka mga indibidwal sa bahin sang NPA ang naengkwentro sang mga militar.
Wala naman sang may nasamaran sa bahin sang mga suldado.
Ginpasalamatan ni Martinez ang Alkalde sa ciudad sang Kabankalan kag ang mga pinuno sang mga Barangay bangud sa pagbulig kag pagkooperar agud mapabilin ang kalinong kag seguridad sa lugar.
