Wala pa sang pamilya nga nagclaim sa bangkay sang tatlo ka miyembro sang New People’s Army nga napatay sa engkwentro batok sa 47th Infantry Battalion sang Philippine Army sa Prk Santol, Brgy Tampalon, Kabankalan City alas- 4:00 kahapon sang kaagahon.
Ang mga napatay amo ang squad leader sang South-Western Front (SWF) nga si Joedil Balsimo alyas Junjun/Cairo, kag ang NPA members nga sanday Ritchie Verano alyas Makoy/Akiro kag Milky Sampini alyas Gorting.
Sa interview sang Bombo Radyo kay Lt Col. Dennis Martinez, Commander sang 47th IB, positibo nga ginkilala sang mga anay rebelde ang tatlo ka mga napatay apang wala nahibaluan kun diin ang ila mga address.
Suno kay Martinez, natabo ang engkwentro kasunod sa pagreport sang pumuluyo nga may yara sang presensya sang NPA sa lugar.
Suno pa diri, ang mga NPA nga naencounter sang mga suldado amo man ang mga suspek nga nagpatay sa 74 anyos nga si Leonora Anguit nga survivor sa natabo nga engkwentro sang tinalikdan nga tuig.
Siya ginbalikan sang mga NPA para patyon kag gin-ako man sang rebelde nga grupo ang ila ginhimo.
Samtang, sila man ang suspek sa pagluthang-patay kay Renante Vedarte, 39 anyos nga residente sang Brgy Tapi, Kabankalan City.
Pahayag ni Martinez, ginaplanohan na sang Local Government Unit nga ideklarar nga persona non grata ang mga NPA.
Nagpasalig naman si Martinez nga safe ang mga nagahatag sang impormasyon angot sa NPA kag tinguhaan sang militar nga mahatag ang malinong nga komunidad sa mga pumuluyo.
