Joint oil kag gas explorations sa tunga sang Pilipinas kag China sa West Philippine Sea, mahimo nga isa ka “trap”?

Prangka nga ginpaandaman ni retired Supreme Court Associate Justice Antonio Carpio ang gobyerno nga posible mangin isa ka dako nga “trap” ang liwat nga ginaduso nga joint oil kag gas explorations sa tunga sang Pilipinas kag China sa West Philippine Sea.

Sa pagbisita sang anay hukom sa Pag-asa Island, ginpahayag sini nga ang pagsulod sa nasambit nga kasugtanan ang nagakahulugan lamang sang pag-ako sa kondisyon sang Beijing nga sila ang nagapanag-iya sang mga dunang manggad sa gina-agawan nga teritoryo.

Ini ang ginpabutyag ni Atty. Carpio matapos magpahayag si President Ferdinand Marcos Jr. nga bukas ini sa liwat nga negosasyon sa Beijing para sa isa ka joint energy project agud masiguro ang energy security sang pungsod sa tunga sang nagakatabo nga kinagamo sa Middle East.

Sa bahin sang Department of Forein Affairs (DFA), gin-athag ni Secretary Maria Theresa Lazaro nga wala pa sang pormal nga kasugtanan sa karon apang bukas ang gobyerno sa posibilidad.

Ginkumpirmar man ni Foreign Affairs Undersecretary for Policy Leo Herrera-Lim nga yara pa lamang sa exploratory stage ang pag-istoryahanay sa idalom sang 11th Bilateral Consultation Mechanism (BCM) sa Fujian, China.