Personal nga ginkilala sang ila nga himata ang duha sa 19 ka mga rebelde nga napatay sa natabo nga engkwentro sa tunga sang 79th Infantry Battalion sang Philippine Army kag New People’s Army sa Brgy Salamanca, Toboso, Negros Occidental.
Ang mga natumod nga bangkay ang ginlakipan nanday Rowel Sabillo, 19 anyos, residente sang Brgy Tabunac, Toboso kag Rene Villarin Sr., 67 anyos, residente sang Brgy Marcelo, Calatrava, Negros Occidental.
Si Sabillo ang ginkilala sang iya bayaw nga si Chiq Dela Cruz, ang Chief Barangay Tanod sang Brgy Udtongan, Escalante City, Negros Occidental.
Sa interview kay Dela Cruz mabuot man nga bata si Rowel kag antes pa man ini napatay sa engkwentro, ginhagad pa siya nga maglagaw sa isa ka lugar sa Escalante.
Suno diri natumod niya ang bangkay bangud sa pinalian sang pilas sini matapos nga maaksidente sa motorsiklo.
Ginpahayag man sini nga wala sang gamo nga bata si Rowel apang aminado man ini nga may barkada man ini nga mga bugoy.
Si Sabillo ang kamanghuran sa ila nga mag-ulutod.
