Padayun ang panawagan sang 79th Infantry Battalion sang Philippine Army sa mga nabilin pa nga miyembro sang North Negros Front sang New People’ Army nga magsurrender na kag magbalik sa sabak sang gobyerno.
Sa interview sang Bombo Radyo Bacolod kay Lt Col Eric Alfonso, commander sang 79th IB, padayun pa ang ila nga paglagas sa mga nabilin nga miyembro sang grupo ni Roger Fabiliar, nga mas kilala bilang si Arnel Tapang ukon Jhong, nga naka-engkwentro nila sa banwa sang Toboso.
Luwas sa 19 nga napatay sa Toboso, naaresto man nila paagi sa pagserbe sang warrant of arrest, sa bulig sang Criminal Investigation and Detection Group (CIDG), ang lima pa ka miyembro sang grupo sa Brgy Matab-ang, Talisay City, Negros Occidental.
Ang mga nadakpan ang ginalakipan nanday Danny Boy Pacheco, 34 anyos, residente sang San Carlos City; Judy Manayon Caramihan, 34 anyos, residente sang Murcia; Julie Ann Balora, 26 anyos, residente sang Murcia; Jerome Escamrosa Seballos, 57 anyos; residente sang Brgy. Bata, Bacolod City; kag Glemmar Ruelis Bacusmo, 48 anyos, residente sang Zamboanga Sibugay.
Isa sa ila ang nakitaan sang pilas sa tangkugo, gani ginapatihan nga sila ang mahimo kaupod sa mga nakasumpong sang militar sa Toboso.
Gina-imbestigaran man nila sa karun kun may mga rebelde pa nga gikan sa iban nga front nga ginpadala agud mag-augment sa North Negros Front.
Suno kay Alfonso, wala nila nakita ang posibilidad sang pagtukod sang regional center sang NPA sa banwa sang Toboso, sa baylo nagapati ini nga nagtipon ang mga NPA members para sa ila nga meeting para sa mga tactical offensives kag attrocities.
Panawagan ni Alfonso sa mga nabilin pa nga rebelde nga magsurrender na samtang yara pa ang mga programa nga ginatanyag sang gobyerno.
Nahibaluan nga ang gobyerno ang may ginatanyag nga financial, livelihood, housing kag educational assistance para sa mga nagasurrender nga rebelde.
