Nasapwan ang bangkay sang isa ka miyembro sang Communist Terrorist Group (CTG) nga ginbilin sang iya nga mga kaupdanan kasunod sang nagluntad nga engkwentro sa tunga sang rebelde nga grupo kag tropa sang 62nd Infantry Battalion (62IB) sa Sitio Calambia, Barangay Trinidad, Guihulngan City, Negros Oriental, kahapon, Agosto 17, 2026
Ang bangkay ginkilala nga si Cristito Nilles Sr., alyas “Dagohoy,” miyembro sang Squad 2 kag CO sang Section Guerilla Unit 3 sang dismantled na nga Central Negros 1 (CN1).
Suno sa report, nasamaran siya sa lima ka minutos nga firefight kag sa ulihi ginbayaan sang iya mga upod sa Sitio Uyangan, Barangay Budlasan, Canlaon City.
Narekober sang mga tropa ang iya bangkay sa nagpadayon nga pursuit kag clearing operations.
Nagluntad ang engkwentro sang ginpalupkan sang mga nabilin nga miyembro sang CTG ang mga tropa samtang nagapatuman sila sang security operations bangod sa mga report may kaangtanan sa presensya sang armado nga grupo sa lugar.
Nakarekober man sang mga military ang isa ka M16 rifle, tatlo ka long magazine, mga bala, kag personal nga mga gamit sa lugar sang engkwentro.
