Ginpahayag sang Commission on Human Rights nga nagpatigayon na sila sang independent investigation may kaangtanan sa nagluntad nga engkwentro sa tunga sang militar kag gina-alegar New People’s Army members sa banwa sang Toboso, Negros Occidental sang Abril 19.
Ini ang nagresulta sa 19 ka mga napatay.
Ini kasunod sa gina-alegar nga nakita sang CHR nga mga inconsistencies ukon wala nagasanto nga mga pahayag angot sa pagkilala sa mga biktima.
Ginakwestyon sang pila ka grupo ang pagkalakip sa napatay nanday UP Diliman student leader Alyssa Alano kag community journalist RJ Nichole Ledesma, nga 7th nominee sang Kabataan Partylist sang 2022 Elections.
Ginapanawagan man sang CHR ang kooperasyon sang mga natungdan para sa nasambit nga imbestigasyon.
Pahayag man sang pila ka grupo nga ang iban nga mga napatay ang mga sibilyan, kag yara lamang sa lugar para sa community work.
Samtang, ginapanindugan sang Armed Forces of the Philippines (AFP) nga lehitimo ang ila operasyon kag ang mga napatay ang miyembro sang NPA.
