Magapatigayon sang orientation ang Environmental Management Bureau para sa mga Barangay personnel sa Bacolod City nga ideputize sa pagdakop sang mga nagapatigayon sang illegal dumping sang mga basura.
Sa interview sang Bombo Radyo Bacolod kay Atty Allyn Luv Dignadice, officer in charge sang Bacolod Environment and Natural Resources Office (BENRO), ang kada Barangay sa Bacolod ang required nga magpadala sang duha ka partisipante sa orientation nga pangunahan sang EMB.
Kaupod man diri ang Bacolod City Legal Office.
Nahibaluan nga ginpasanyog pa sang ciudad ang tikang batok sa nagduging nga mga mini dumpsite ukon illegal dumping site.
Ang tuman ka damo nga basura man ang nakita nga isa sa mayor nga rasun sa pagluntad sang malala nga mga pagbaha tinalikdan nga tuig.
Ang mga Barangay officials ang may mga nagkaladakpan naman nga nagahimo sang illegal dumping, apang sa masami wala na sila nakahibalo kun ano ang sunod nga himuon.
Ang workshop kag orientation ang magalawig sang apat ka adlaw, apang tungaon sa duha ka team, ukon tigduha ka adlaw para sa kada team.
Sila ang tudluan sa kun paano ang recording, apprehension kag documentation.
Pinaagi sini, may ara sang plastado nga systema kag maseguro nga makafile sang nagakaigo nga complaint sa mga madakpan.
