Wala na sang kabuhi sang nasapwan ang 13 anyos nga babayi nga namissing sa Sitio Lawagon, Barangay Poblacion West, Candoni, Negros Occidental.
Ang biktima ang ginkillala nga si Alyas Rica, residente sang Purok Pag-ulinganan, Barangay Haba.
Sa interview sang Bombo Radyo kay PLt Leonel Adolacion, acting chief of police sang Candoni Municipal Police Station, sang Abril 26, alas- 7:00 sang gab-i, ginsugo ang dalagita nga magbakal sang ice sa tyangge apang wala na ini nakapauli.
Nagpati ang ginikanan nga nahapit ang bata sa iya abyan apang sang ginpangita ini, wala sang may nakahibalo kun diin ini nagkadto.
Alas- 8:20 sang gab-i sang Abril 27, nasapwan sang 15 anyos nga lalaki kag sang iya abyan ang bangkay ni Rica sa sulod sang kampo sa Barangay Haba.
Suno kay Adolacion, nasapwan ang bangkay ni Rica malayo sa ila balay kag sa pihak na nga barangay.
Nasapwan ini nga may duha ukon tatlo ka pilas sa agtang nga ginapatihan tuga sang pagpanglampos.
Samtang kumpleto naman ang iya panapton.
Sa karun natalana nga ipaidalom sa autopsy ang bangkay sang dalagita agud mahibalon ang rason sang kamatayon sini.
