Ginbawian sang kabuhi ang lalaki nga ginbuno sa bahin sang Goldenfield Commercial Complex sa Barangay Singcang-Airport, Bacolod City, pasado alas-9:00 kagab-i, Abril 28.
Ginkilala ang biktima nga si alyas “John Rey”, residente sang Purok Magsungay, Brgy. Singcang Airport samtang ang suspek amo si alyas “Timmy”, 27-anyos kag residente sang Barangay 16.
Sa interview sang Bombo Radyo kay PCapt. Sherwin Galupar, Officer in charge sang Bacolod Police Station 8, ang duha ang magkilalahay apang may nakaligad na nga indi paghangpanay.
Suno kay Galupar, isa ka babayi nga nangin karelasyon sang duha ang rason sang pagpangbuno sang suspek.
Ang biktima ang nakaagom sang multiple stab wounds nga nagresulta sang iya kamatayon.
Sa karon, ang suspek ang yara na sa kustodiya sang Bacolod Police Station 8 para sa nagakaigo nga disposisyon.
