Nagpaandam ang Acting Chief of Police sang Murcia Municipal Police Station nga indi magpati sa nagalapta nga solicitation letter nga nagagamit sang iya pangalan.
Ini kasunod sang natukiban nga nagpalapta sang solicitation letter sang private group nga K-9 Handler Incorporated Tactical Unit.
Nakapirma sa letter ang National Director sang grupo nga si Almar A. Barte Sr., K9 Founder Francisco A. Bentinganan, kag narecieve sa pangalan ni Police Captain Honey Labaro, ang Acting Chief of Police sang Murcia Municipal Police Station.
Ang grupo ang nagapangayo sang financial support para sa dog food, training equipment, uniforms, kag bisan in-kind donations para sa mga K9 handlers kag sa ila mga ido.
Sa interview sang Bombo Radyo Bacolod kay Labaro, indi konektado sa Murcia Municipal Police Station ang private group, kag indi man sini kilala ang natungdan.
Suno diri, wala sang problema kun magsolicit ang mga ini apang makabig nga “identity theft” ang paggamit sang iya pangalan ilabi na nga ini ang pirmado pa.
Dugang pa sini nga wala man sang nakarequest sa iya sa paggamit sang pangalan para sa kaangay nga transaksyon, kag panindugan sini nga apisar pa nakapangayo sang pahanugot, siya ang indi man gihapon makasugot.
Sa karun, ginatumod na nila kun diin nakahamtang ang grupo agud mapatawag ang mga nakapirma sa letter.
Pahanumdom sini sa iban nga iverify anay antes maghatag sang kwarta sa kaangay nga mga solicitation efforts.
