Nag-abot na subong nga adlaw ang pila ka mga delegates nagikan sa Region 3 para sa National Private Schools Athletic Association (PRISAA) Games 2026 kun sa diin ang ciudad sang Bacolod ang maga-host.
Sa interview sang Bombo Radyo kay Dr. Jake Lauren Mercado, STI Executive Director, NIR Head, STI Student Development Program, nakaabot na ang pila ka mga atleta nagikan sa region 3 kaina sang aga samtang lauman naman nga magaabot ang iban nga atleta halin sa Region 11 sa subong nga gab-i.
Suno kay Mercado, preparado na ang mga billeting areas nga pagatulugan sang mga atleta nagikan sa nagkalain-lain nga rehiyon.
Ginaluaman sini nga masobra 12,000 ka mga delegates ang magakadto sa probinsya sang Negros Occidental.
Pahayag ni Mercado nga nagkoordinar naman sila sa Bacolod City Police Office, Disaster Risk Reduction and Management Office, Department of Education (DEPED) kag nagpatigayon naman sila sang ocular visit sa mga venue para sa nagkalain-lain nga hampang.
Bangud sa tuman ka init nga panahon, pahayag ni Mercado nga nagkoordinar man sila sa Bereau of Fir Protection (BFP) sa pagmonitor sa water supply sa kada venues.
Dugang pa, padayon ang ila pagkoordinar sa provincial government para sa ila preparasyon sa pag abi-abi sa mga bisita.
Ang opening ceremony sang PRISAA ang magasugod sa May 9 sa Panaad Park and Sports Complex samtang sa May 16 naman pagatigayunon ang closing ceremony sa STI West Negris University Gymnasium.
Suno diri, ini ang dako nga platform para sa mga atelata nga isa ka bugal sa tanan nga komunidad sa bilog nga probinsya.
