Nagpaandam si Chinese President Xi Jinping kay US President Donald Trump nga mahimo maglab-ot sa “giyera” ang duha ka pungsod kun magsala sa tikang ang Estados Unidos angot sa isyu sa Taiwan.
Ini ang prangka nga ginpahayag ni Xi sa ila nga summit meeting ni Trump sa Great Hall of the People sa Beijing.
Sa iya nga speech, ginpaathag sini nga ang topiko natuhoy sa Taiwan ang pinakasensitibo kag pinakaimportante nga isyu sa tunga sang US kag China.
Gindeklarar sang lider sang China nga ang ideya sang kahilwayan sang Taiwan kag kalinong sa rehiyon amo ang kaangay sang “tubig kag kalayo” nga indi gid mag-ugyon.
Samtang seryoso naman si Xi tuhoy sa Taiwan, mas nagatutok si Trump sa pakignegosasyon agud sulbaron ang trade war, partikular ang pagbakal sang China sang mga agricultural products, enerhiya, kag mga eroplano naggikan sa US.
