Gin-anunsyo sang Office of the Ombudsman ang mando para sa preventive suspension ni Acting Senate Sergeant-at-Arms Mao Ranada Aplasca, epektibo gilayon, may kaangtanan sa Senate shooting incident.
Sa idalum sang mando, ginsuspender si Aplasca nga wala sang sweldo sa sulod sang anum ka bulan ukon tubtub matapos ang administrative hearing may kaangtanan sa iya kaso.
Suno kay Ombudsman Jesus Crispin Remulla, ang padayon nga pagtinir ni Aplasca sa pwesto ang mahimo makaapekto sa integridad sang imbestigasyon angut sa mga hitabo sa Senate building sang Mayo 13.
Katuyuan sang preventive suspension nga mapreserbar ang mga dokumento kag ebidensya nga yara sa iya kustodiya kag malikawan ang posible nga impluwensya sa kaso.
Kadungan sini, nagpagwa man sang Subpoena Duces Tecum ang Ombudsman para sa CCTV footage sang second floor kag basement parking sang Senado halin Mayo 13 tubtob Mayo 14.
Padayon pa ang imbestigasyon agud mahibaluan ang bug-os nga detalye sang insidente kag ang posible nga salabton ni Aplasca.
