Patay ang isa ka dialysis patient samtang pilason naman ang amay sini matapos nakabunggo sa truck ang ginamaneho nga salakyan sa bahin sang National Highway, Brgy. Binicuil, Kabankalan City alas-11:44 kahapon sang aga, May 25.
Ginkilala ang napatay nga si alyas Juan, lalaki, 33-anyos, wala sang asawa samtang ang amay sini ang ginkilala nga si alyas Gody, 62-anyos, pastor lunsay mga residente sang Prk. RD, Brgy Su-ay, Himamaylan City.
Sa inisyal nga impormasyon, ang truck nga ginamaneho ni alyas Jose, 28-anyos, lalaki, wala sang asawa nga residente sang Sitio Mambucano, Brgy. Cabatangan, Talisay City ang nagabiyahe halin sa Kabankalan City padulong sa Bacolod City.
Samtang, nagabiyahe naman ang mag-amay gikan sa Himamaylan City padulong sa Kabankalan City agud magbakal sang oxygen tank para sa iya nga bata sang napiyongan ini kag aksidente nga nakabunggo sa truck.
Ginhingagaw pa dala sa ospital si alyas Juan apang ini ang gindeklarar nga dead on arrival, samtang ang amay sini ang padayon pa nga ginabulong.
Ang driver sang truck ang yara sa kustodiya sang Kabankalan City Police Station para sa nagakaigo nga disposisyon.
