Nagpanawagan ang Philippine National Police (PNP) sang gilayon nga pagrepaso sa cybersecurity measures sang mga ahensya sang gobyerno kasunod sang magkatuhay nga pag-atake sa mga website sang Senado kag Kamara de Representantes.
Suno sa PNP, nagaserbe nga paandam ang insidente nga kinahanglan sang mas hugot pa nga seguridad sang mga digital system sang gobyerno batok sa nagalala nga pamahog sang cyberattacks.
Nauna na nga nareport nga na-deface ang website sang Kamara sang Sabado, pila ka adlaw matapos gintarget sang mga hacker ang opisyal nga website sang Senado.
Gin-ako sang isa ka grupo sang mga hacker ang responsibilidad sa mga pag-atake kag ginpahayag nga protesta ini batok sa koraspyon sa gobyerno.
Bilang sabat, ginmanduan sang PNP Anti-Cybercrime Group nga makig-angot sa mga information technology kag cybersecurity personnel sang Kamara agud magbulig sa ginapatigayon nga imbestigasyon.
Magpakig-angot man ang kapulisan sa iban pa nga nagakaigo nga ahensya agud matumod ang ginhalinan, pamaagi, kag kasangkaron sang nangin pag-atake.
