Nagpadala sang specimen samples sang napulo ka baboy ang ciudad sang Bacolod para matest kun positibo sa African Swine Fever (ASF).
Sa interview sang Bombo Radyo Bacolod kay Bacolod City Administrator Atty Mark Steven Mayo, ginafinalize na nila ang team nga magatawo sa natumod nga 13 ka entry point bilang Border Control.
Ini ang kalakip sa ila nadiskusyunan sa pag-reconvene sang ASF Task Force sa pagpanguna ni Bacolod City Mayor Greg Gasataya.
Suno kay Mayo may napulo ka baboy nga napatay, nga ginkuhaan nila sang specimen sample.
Ini ang ginalakipan sang duha sa Brgy Alijis kahapon, pito sa Brgy Taculing kag isa sa Brgy 35 sa subong nga adlaw.
Suno diri, may machine ang Bacolod City para sa ASF testing, gani ginaproseso na ang pagprocure sang test kits agud indi na kinahanglan ipadala sa Department of Agriculture Western Visayas.
Pahayag ni Mayo nga may 109 nga rehistrado nga backyard hog raisers sa ciudad sang Bacolod.
Panugyan nila sa mga nagasagod sang baboy nga kun makita nga may senyales sang ASF ukon nagapalangluya, ireport gilayon.
Samtang sila ang magapatigayon man sang information kag education campaign sa mga meat vendors.
Suno diri, ang mga vendors ang dapat may meat inspection certificate, nga pamatuod nga ang karne ang gin-ihaw sa slaughterhouse.
Panugyan niya nga likawan ang pag-ihaw sa mga nagamasakit na nga baboy, kag mas labi nga indi dapat mag-ihaw sang mga napatay na ukon double dead.
Paandam ni Mayo nga ini ang supak sa layi kag magapanabat ang magabayolar diri.
